استاذ / عادل التوني
لو .. تعرفي
............
لو تعرفي
اِن الجمال مابين عيونك
يستخبى ويختفي
لانك اِنت كُل حاجه
وكُل حاجه بتعشقك
زى القمر والشمس
نور ... مابينطفي
لو تعرفي
لو تعرف
ان الحب انت
اسمه خدوه من رقتك
وان الحنان هو
همسك ..
لمسة ايديك
نظرتك
دا انا مهما اكون قريبة منك
دايما واحشني
منك ابدا ما بكتفي
لو تعرف
............
لو تعرفي
ياحُضن دافي انا بعشقهُ
اِحساس جميل مِصدقهُ
وقلب طفل يجنني
من غير ماقولهُ حَبني
بيحبني
ويزيد فى حُبه مابكتفي
لو تعرفي
لو تعرف
انا اد ايه بعشقك
في كل كلمة بصدقك
بعشق ايديه في حضن ايديك
شوقي بيزيد ما بينطفي
لو تعرف
................
لو تعرفي
إنك أميرة ... وألف جان
وشهر زاد وكهرمان
ولحن فيروزي جنان
وحاجات جميلة كتير قوي
من غير ماتحكي وتوصفي
لو تعرفي
لو تعرف
حلمت بيك من زمان
فارس جايلي فوق حصان
جايب معاه شبكتي
واما شوفتك قلبي طار
من فرحته نبضي زاد
كان كل امله جوة منك
يستخبي ويختفي
لو تعرف
..........
لو تعرفي
تاريخ ميلادي انا بكتبه
فى ضحكتك
وعمرى كله انا بحسبه
بين نظرتك
بتنفسك ...
و... انت الحياة
لو تعرفي
لو تعرف
يوم لقاك كان مولدي
هو بداية دنيتي
انا بعترف
ان انت ليا كل الحياة
بعدك عني متلفي.
لو تعرف
....................
عادل التوني
ياسمين عبدالرؤؤف محمد
ليست هناك تعليقات:
إرسال تعليق