..... صرخة سكات ....
كلمة استنتها ما قولتيهاش
كان نفسي أسمعها مسمعتهاش
عدي اليوم ف حبة دقايق
لا اتكتبت منك ولا شوفتهاش
خايفة أشوف ضعف قلبك
خايفة أحس بشوقك وحبك
خايفة تطلع منك كلمة بحبك
كنتي قوليلي ما تستنهاش
عينيكي أنا شفت اللي فيها
قالتلي حكاية صعب تداريها
حكاية حب إسمي حواليها
جالك قلب النهاردة متقوليهاش
ياحكاية والخوف ساكن فيها
بتخافي حتي ف يوم تحكيها
سنين شايفك بعينيكي بتقوليها
سنين وف سجن قلبك حبي عاش
شايف ف عينيكي خلينا كده
صحاب عمر وده عندي رضا
مش عايزاك تضيع مني سدي
وآجي أصالحك بعندك ما ترضاش
عارفة إنك عارف إني بحبك
وعارفة إن عيني فضحاني عندك
وعارف إني بأفرح ساعة قربك
أقول بحبك ونفترق ما أرضهاش
سيبني أحبك كده من سكات
وبأشوفك صاحب كل الأوقات
بنضحك ونخرج وتسمعني حكايات
عن واحدة عرفتها وحبها راح بلاش
أخاف أبقي ف يوم زيها
يضيع حبي زي ما ضاع حبها
ونتقابل إتنين أغراب بعدها
إحنا كده إللي بيننا ما إنتهاش
عايشة حبك في سجن جوايا
أسيبك أروح ودمعتي ويايا
أقولك بحبك وللا أخليك معايا
ياحكاية حلفت قلبي ما يحكيهاش
سامحة لنفسي أحبك من سكات
وأسمع حكاياتك كأن قلبي مات
وأعيش لقاك بكلام ف شوية حاجات
ونار جوايا بأستحلفك ما تطفيهاش
وبين لقاك وسكاتي عايشة عمرك
من أول لقانا للوداع بأقول بحبك
لو سيبت نفسي في حضني هاخدك
وأقولك ليه كلمة بحبك ما قولتهاش
.... أيمن بلال .....
ليست هناك تعليقات:
إرسال تعليق