بعنوان/ تحرير روح
بقلمى/حنان العجمى#
مَكُنتِش أعرَف إنَّك أنانى
ولا روحِى هَتِتحَرَّر من عُدوانِى
ولا كُنت أعرَف إنَّك فيلم الرُّعب الوهمى
وقدَر اتسَطَّر وبإيدَك اتحَضَّر
ولا إنِّى يوم هَتعَب وأقاوم وأغلِب
مَكُنتِش أعرَف إنَّك غادر
وعَ الفُجر قادر
ولا إنِّى هَعَانِى
ولا كُنت أعرَف شكل الدنيا الفانى
مَكُنتِش عايزة أكُون ضحيَّة وإنتَ الجانى
ولا كُنت عايزَة ألعَب دور مِشْ دورى
ولا أكون يوم فى دنيتَك
ولا يهمِّنى تمثيلَك كُرهَك
ولا تِلزَمنِى مَحَبِّتَك
مَكُنتِش عايزَة انتصارات
ولا أعيش دور ظالمنى
ولابِروازَك أكسر
وأدوس عَ الصورة وأظهر
ولا أحضَر قَفلِة قَبرَك ودَفنِتَك
مَكُنتِش عايزة أخرُج عن طُورِى
ولا كُنت أعرَف إنِّى هَغَيَّر دورى
مَكُنتِش عايزة أكون ضحيِّتك
ولا كُنت أعرَف إنَّك جلادى
ولا إنِّى ف يوم هَعرَف أعادِى
ولا كُنت أعرَف إنِّى ف يوم هَتحَدَّاك
وأخَلِّيك فُرجَة وعِبرَة لأمثالك
مَكُنتِش أعرَف إنِّى هَقفِل بابَك
وسَد ورَدم بينى وبينك
ولا كُنْت أعرَف هَتقوم على إيدى قيامتك
ولا إن يأجوج ومأجوج أصلَك
مَكُنتِش أعرَف إن الحيوان بذَوِيه أرحم
ولا كُنْت أعرَف إنِّى لازِم أَغَيَّر دَمِّى وأعَقَّم
ولا إن مَحجُوزلك حفلة ف جَهَنَّم
مَكُنتِش أعرَف إن أبو لَهَب الكافر
كان بِأُم جَميل أكرَم
ولا إن ف زَمن الوباء إنتَ وباء أعظَم
حسبى رَبِّى وقدرِتُه
وفضلُه عَليَّ ونعمِتُه
ساجدة وعارفَة حِكمِتُه
شَمَلنى بعطفُه ورحمِتُه
حنان العجمى#
ليست هناك تعليقات:
إرسال تعليق