.....احلام ورديه ....
اذيك .
اهلا وسهلا
ممكن اسال سؤال
اتفضلى انا تحت امرك
اكيد سؤالك مش محال
انا كنت بس عاوزة اعرف
دلوقتى تبقى الساعه كام
خمسه وربع وثلاث ثوانى
بالتمام وبالكمال
ميرسى لذوقك..ممكن اقعد
اتفضلى طبعا ...يا سلام
انا حساك مشغول فى واد
اصلى من الناس الجداد
لسه واصل من برا حالا
لفيت كتير بين البلاد
تهت.تعبت .بس بصراحه
حسيت فى عيونك امان
بضحكه رايقه من عيونها
وصوتها قالى ياااااا سلام
اسمك اى
انا فجاءة تهت
ونسيت كمان كل الكلام
لحظه بس قبل الاسامى
انا شفتك فى صحوى ومنامى
قوام لحقت تفتح حوار
معلش ضاع منى الوقار
من جمال وروعه عيونك
شوق فى قلبى بحسه نار
بقولك
نعم
متيجى نتمشى سوى
بين الزهور نشم الهوى
تمسك ايدى وهبقى ليك
بس لو قلبك نوى
اتمشينا .تهت فى جمالها
وايدى دافئه اوى من سلامها
وااااااه من رقت الصوت
وجمال اسمى مابين كلامها
اتقابلنا واتواعدنا
وسطرت قلوبنا المعانى
لو يوم تغيب اتعب ....أعانى
جبت شبكه وكام هديه
مخلاص حبيبتى راح تبقى ليا
وحجزنا فستان والطرحه
وحددنا معاد للفرحه
والاحباب كترت وطلت
والافراح رقصت وهلت
وايدى ماسكه فى ايديها
واحلى فرحه فى عيونى ظهرت
لما ابتسمت ليا عينيها
والصحاب فى ودنى تهمس
القمر دى منين لقيها
وبدئنا نرقص على الاغانى
واستقبلنا كل التهانى
ولما رفعت الطرحه عنها
علشان ابوسها فى جبينها
بوسه هادئه بصفو نيه
لقيتنى فاجاءة بردان بجد
لما شلت البطانيه
واكتشفت انى بحلم
حلم أطيافه ورديه
#طارق العدل العدل
ليست هناك تعليقات:
إرسال تعليق