....................
طول عمري مسجون
في الحياة ضاق بيا عيشي
والشمس غادرت حينا
وظلمني طيشي
سنين بدور عالحلال
إنسان شريف
مكفي حالي بهدميتي
واللكام رغيف
رافع شعار القناعه
لقمه حاف وهدمه خيش
زارني الشيطان لغروري شالني
كساني ريش ..
خلاني ولا فارس زمان
شحات بسيف
لا ساب لي عقلي أخد ولا أدي
وحيصي بيص
جاب شنطه قال فيها دواك
حظك نداك
شيل من سكات إفتح وعيش
الأيد تشاور نفسها
أخرة شقايا في خدمتك أبيع حشيش
مرات وعديت
واللي جاي مكفنيش
وحلت نفسي في سيل سموم
هيروين حشيش
وجريت كتير عالحرام ماهمنيش
فلوس كتير ملهاش عدد
سنين ومحروم من الولد
جاه الولد عزوة وسند
لا نفعني قرشي إني أصلحه
وداق سمومي لحكمته
سبحانه نفذت كلمته
قرشي الحرام ولع وطفى بسمته
حرق اللي باقي مني أنا
راح الوريث فات دنيته
أخر الحرام كلبشت عمري
في ايد شاويش ..
وخدوللي صورة وصمه عار
بصمه وأفيش ..
همس في ودني أخدم في حالي
الباش شاويش ..
رماللي مفتاح وايا خبزة
وقاللي عيش
ولما تهرب من هنا ما تنسانيش
العقل قال خد مفتاحك
وأفتح وروح فك سراحك
يرجع يقول يرتاح بالك
في السجن عيش ..
هتخرج لمين لمرار حالك
ده الحبس تأديب لجنابك
عالخبزة عيش ..
شكلك هترجع في كلامك
قول للشيطان إن يوم جالك
ندمان و تاب
هكفي حالي بخبز مر
وألكفيت ضميري في توب ندم
ويغفر لي ربي ذنبي أنا
جوايا حاسس بالفرح
في السجن حر
يا باش شاويش شيل مفتاحك
ما يخصنيش
تابيت عينيه عن الحرام
وعايز أعيش
بقلم .. صبري رسلان
ليست هناك تعليقات:
إرسال تعليق