....خوف ...
بخاف من حبك ساعات
ومن كلامك وم السكات
من ألف حاجة كانت هنا
من حلم عشته بس مات
بخاف سنينك إللي جاية
لتكون زي إللي عدت بيا
كاس ألمك فيها كان هدية
أشربه لما تهلي بالذكريات
بخاف م الحنين والأنين
وضحكة زمن وطبع السنين
من لقا تسأليني فيه إنت مين
وألقاكي ناسية كل إللي فات
بخاف زمن نبقي فيه أغراب
منلاقيش بيننا حتي كلمة عتاب
نسينا وللا إتنسينا بلا أسباب
وأقولك حبنا تقولي الحب مات
بخاف يتوه عن غنوتنا النغم
والغنا يبقي أنين مليان ألم
والضحكة تاخدها دمعه للعدم
وصوت هوانا يبقي حبة ٱهات
بخاف ليل هواه كان سكتك
وقمره نور طل علي بسمتك
ونجومه حور بترقص لغنوتك
تفضل ضلمته بس والسكات
بخاف من حضنك لأعشقه
وإفتكر إن عمري راح يسكنه
وأجيب فرح السنين وأحضنه
وأصحي ألقي حكايتنا ذكريات
بخاف أصدق إن حبك عالدوام
عمر أصحي عليه وبيه أنام
يبقي حقيقة مش وهم وأحلام
حب صعب يوم نقول عدي وفات
حبيبتي حظي عارفه ما يوم إكتمل
يوم سعادة والباقي حزن لا يحتمل
فيه طبع الحزن طاغي علي الأمل
صدقيني فرحي إللي راح ما مرة عاد
..... أيمن بلال....
ليست هناك تعليقات:
إرسال تعليق