يا قمر سهران وحدك بعالي السما...
متلك انا سهرانة..جافاني الغفا...
تعبت عيوني وانا نعد نجوم...
نجمة غفت ونجمة سهرانة عالهدى
وياليل الغربة ..طويت من عمري سنين
انطر على الشباك..وحدي بهالمدى
لا ايد تمسح عن جبيني غبرة الايام
ولا طيف يلوح من بعيد ..مافي حدا
صرخت بكيت وينن حباب القلب
غابو تركوني ضاع صوتي بلا صدى
يا شجرة الايام وراقك طيرها الهوى..
متل عمري اللي ضاع وبعدني ناطرة
تشرق شمس تمحي العتم تضوي المدى
يطل الربيع...حامل معه زهور وسوسنة
تا اشبكا بشعري ..يمكن تردله الروح
ويرجع لونه الاسود..وتزيد الولدنة..
ويفتح الياسمين..وينشر وروده...
وتزهر الشجرة ..ويرجعو عصافير..
بعد طول غياب...وتضحكلي الدني..
واجمع ورود بيضا وصفرا وحمرا داكنة
اعمل عقد او زين الفستان..
وانده بأعلى صوت يمكن يسمعو الغياب
ويبعتو مع طير ال بالسما منهم جواب
اشتقنا يا سمرة ..سامحينا طولنا الغياب
منرجع...ضلك ناطرة ولا تغفلي..
يمكن نجي شي يوم نزورك من خلف الضباب
او ننده عا غيمة مسافرة ناطرة ركاب
تحملن عا ارض عطشانة لوعها الغياب
وارتوي انا والارض....بدموع السحاب
وقتها بمسح دموعي..وبترك دموع السما
تبكي عاغيبتن...وبيرجع لقلبي دقاته
ويضحك قمر ويفل حامل معه كل العذاب
بقلم ايفون موسى طعمة
ليست هناك تعليقات:
إرسال تعليق