---------------------
بفتح شباكي الاقيها
تقفل شباكها اشتاق
قلبي دايما يلاغيها
عيونها الزاد والترياق
وتفتح تاني شباكها
صادتني ايوه بشباكها
ضحكت ليا من القلب
و بعدتني عن اشواكها
في يوم وعدتني نتقابل
ليلتها منمتش م الفرحه
وغنت للقانا بلابل
صورت حبيبتي بطرحه
شفتها في الشباك واقفه
شاورت قالت مانا عارفه
سألتها عن حبها ليا
بعتت قلبها وف لفه
حدفت م الشباك وردايه
ووراها بعتتلي رساله
شوفت صورتها بالمرايا
ابعد عنها لا استحاله
بنت الجيران حبتني
عن الحساد خبتني
بتخاف عليا من الهوا
اغلى ماعندها ادتني
فتحت نفسي للدنيا
حبيتها والله ف ثانيه
ولاشفت زي طيبتها
ولاتشبه واحده تانيه
مهما عملت بنت الجيران
هيه اصلا طيوبه
بحبها حب وبجنان
ودا من قبل الخطوبه
بنت الجيران عنيها تعباها
بتفرح لما بكون وياها
وبدعيلها من كل قلبي
تخف وأفرح بشفاها
بنت الجيران عايزة تنام
شقيانه ياعيني ياحرام
ليل ونهار بتفكر فيا
شبعتني حب وغرام
بنت الجيران زي الشمعة
مخلتش ولا أي عين دامعه
دايما بشوشه وفرحانه
ولنبضات قلبي اهي سامعه
بنت الجيران عينها عليا
و دايما باصه في عنيا
تضحك وضحكتها جميله
وقلبها اغلى ماليا
بنت الجيران راضيه وعايشه
مش زي البنات الطايشه
تصوم وتحفظ كرامتها
صابرة تملى ومش قافشه
-------------
بقلمي / رمضان عبدالله احمد
ليست هناك تعليقات:
إرسال تعليق