الشاعرة نجوى النوي

$ التفاؤل $

يا شاقية غيّم عليك سحابها

وغابت نجومك في غريق سرابها ...

وخيّم ضباب الوقت زاد عذابها ...

.....غير اصبري ....

هزّت شفرها دوباش لاح وميضها 

ودوباش ما بيّن بريقه فيضها 

يمزّق شديد الوقت يغلب غيضها 

من الذاكرة تمحي بقايا غيابها 

وترسم على سير الحياة ترييضها 

ثمّاش ما تنسى العذاب الصابها 

.... غير اصبري ....

ننسوا التّعب والذّلة 

وننسوا ليّام الخايبة والعلّة 

وننسوا التعدّى م الحياة الكلّه 

دنيا مريضة مظلمة زردابها 

كثيرة مصاببها معاها الزلّة 

وثاقل علينا حملها وحسابها 

....غير اصبري ....

هزين ع لكتاف ثقله حملها

ونتخبطوا ثمّاش ما يبزغ علينا املها

وينزاح عنّا وم الملامح عملها 

وانخرجوها من غريق امصابها 

ويتلم من بعد التشتّت شملها 

ويزهى ربيع العمر في محرابها 

.....غير اصبري ....

كلمات : نجوى النوي // تونس