سفينة الحياة
مش ماشية ليه
علي بعضها
شوية تحدفنا يمين
وشوية تجيبنا بأرضها
زى سكران..... عايش توهان
مش داري طولها من عرضها
ياسفينة يا دوارة
لامتى تسيبينا حيارى
نشرب من الهم أقداح
وتقولى دى تبقى شطارة
أنا اللى فارد شراعك
في وش الريح
لا عرفت يوم الغش
وعيبي كنت صريح
مليتي بالحزن جوفي
وزرعتي جوايا خوفي
لحد امتى يا دنيا
هفضل تملي جريح
مسكت مجدافك أجدف
وأعدي بيكي بحار
حالم اشوف النور
في آخر المشوار
زعلتى منى اكمني
طالب أشوفك عمار
مئة إيد مسكت الدفة
بسرعة قوام و بخفة
زى كدابين الزفة
قلبوا حياتنا مرار
لا عارف ابني جواك حلمي
ولا حتى عارف أشتكي همي
وكل واحد أجرى عليه
يقولى اسكت سيبني في همي
الكل ملهى عشان يعيش
يجري ويتعب عشان العيش
طوق النجاة أصبح مفيش
لان قانونك يحيا التهبيش
طيب أعمل إيه وأنا غلبان
ونفسي أخرج من التوهان
وأحس يوم إني إنسان
وترحميني بقا من التلطيش
**************************
بقلم / مصطفى كرم
ليست هناك تعليقات:
إرسال تعليق