ياحاملة الشيلة مغصوبة
عينيكي السودا معصوبة
قدر مكتوب على جبينك
سنينك تبقى محسوبة
ما بين الوهم والواقع
وبين معشوق وبين عاشق
عزيز الأرض قام راكع
ياسهم وفى القلوب راشق
عزيز الأرض كان سيد
رأي حسنك صبح مملوك
ياحر صبحت متقيد
عيون الجارية ليه شاغلوك؟
جوارى الأرض بتشاغلك
وقلبك ماشي على مهلك
وسور قلبك بألف سياج
سمحت العشق يندهلك
وقام راكب عزيز الأرض
على جواده وراح ليها
فرش ليها الرمال بالورد
ومستنيها ترويها
وكان الرد م الجارية
ياسيد الأرض انا دارية
بقلبك والغرام فضاح
ومستني الجواب ترتاح
لكن قلبك دا لو يتباع
بدرهم بس ....مش شارية
أنا جارية كويتها النار
وخيمتي من المسد والخيش
ولو تجعلني م الأحرار
وتعطيني الغموس والعيش
وتجعلني أميرة كون
وتحميني بخمسين جيش
فأفضلي إن اكون جارية
ولو قلبك بتقل الماس
بدرهم بس مش شارية
أنا قلبي دا ملك الغير
ومالك قلبي كان عبدك
وطول حكمك ما شاف الخير
وتعمل زى ما بدك
ويتحمل سنين وشهور
ومتعشم يحل نهار
ويوم عينه ما شافت نور
راحت روحه بسيف بتار
بأمرك قام أوام فارق
بناقص كلب ف عبيدك
حكمت علينا نتفارق
دا بالنسبالي كان سيدك
وجاي دلوقتى يتوسل
عزيز الأرض للجارية
ياأسوأ حد بتمثل
ياسيد الأرض انا دارية
ولو سعرك يكون بالبخس
بدرهم بس مش شارية
.....A.....S.....
#ابن_الملاح
ليست هناك تعليقات:
إرسال تعليق