مشغول بإيه ؟!
ومشتتاك ليه الحياة؟!
ومفرقاك
ومقسماك بين السطور والأسئلة
ومغرباك
ومخلياك مربوط في بحر المستحيل
ومعلماك
قسوةوشوشها المبهمة
وشايفها هي المُلهِمة
مع إنها نقطة عبور
وف لحظة يخطفنا الرحيل
أوعى يكون أملك طويل
ماتخلهاش تستغفلك
وتخدرك وتنولك حبة قشور
وتبني ليه كل القصور فوق الرمال
وكأن يعني الموج بطل
هيضمها مايهدهاش
وقت الخطر هتلاقي عمرك راح بلاش
يبقى بلاش
أيوة بلاش تسمعلها
دي الدنيا لما تشدنا
بنشوف معاها نفسنا
وكأننا عايشين بنزرع أرض بور
طول ما انت واقف في الطابور
مايهمهاش
ده انت رقم
ورقة ف كتاب
وقت الغياب راح تنقطع
أما الحياة بتمُر
ولايوم تفكر إنها راح تخسرك
انت الوحيد اللي هتخسر كل شيء
علشان كدة اختار طريق
اختار طريق وارسم هدف
وان كان طريقك مختلف لكن بري ء
حافظ عليه
اختار طريق
واعرف وجودك فيها كان في الأصل ليه
نجلاء القاضي

ليست هناك تعليقات:
إرسال تعليق