زجل"
* الصنية **
الصنية قلعة محصنة
والمجمر عبد خادم
والبراد سلطان
والكسان سراية
فكل أوقات وحيان
احلى السوايع ساعة
تجمع الصحاب والخلان
ف جلسة النزاهة
بين شجار البستان
اللمة بلا شاي ناقصة
كيف الصروف بلا ميزان
أتاي عربون الضيافة
والمحبة التابتة والضرافة
جدودنا والناس لقدام
تعاهدو عليه من زمان
البخيل عندهم الزربان
قليل لعراضة ف المكان
اللي ما يحط صنية اللحباب
ما يفتح ف وجوهم باب
ما يحلي كلامو بالترحاب
قيمتو تسوا كمشة تراب
أتاي على الجمر مشحر
بالنعناع الزاهي لخضر
عليه اتفتح قلوب المحبة
به ترطاب الخواطر
اللي ما يتجمع ف لمة
ما يشارك ف كلمة
ما يسمع رنة ونغمة
حياتو خيبة ونقمة
الصنية دايرة مدورة
بوجوه لحباب منورة
زينة الحطة والصورة
النفوس بها مبشورة
تجمع الري والشورة
وتخلي لقلوب مسرورة
عليها يطول لحديث والكلام
واتمحا لغيار والخصام
صلي على صاحب لعلام
يوم الحشر والزحام
عليه ألف وألف سلام
من الرب الجليل العلام
بقلم.
محمد السوارتي اﻹدريسي
ليست هناك تعليقات:
إرسال تعليق