.... عشقك سفر.......
لو ليلك مسافر أنا قلبي في السفر
راحل مهاجر ماشي في دروب القمر
حكايتي وياكي حكاية زمن متغرب
يبعد يقرب معاه حكايات عشق للبشر
وأنا فيكي أيامي تهلي مع الليل أحلامي
أشوفك أميرة وأنا فارس على حصاني
وجزيرة عشق تملكيها وبالهوي مالكاني
وأعيشك هدية عمر راضي عليه القدر
وأحكيلك وتطول حكاوينا وننسى الكلام
ونعيده تاني كأن إللي قلناه مجرد سلام
ونظره ما تعرف زمن تاه زماننا ويا الغرام
يعيش العالم عمره وعمرنا نظره بالمختصر
ولا تكفي كلمة حبيبتي ولا تكفي حبيبي
ولا ف ألف حلم أحلم تكوني يوم نصيبي
أخاف أرمش تعدي لحظه عني فيها تغيبي
لحن الحياه يبتسم لما تكوني الغنا والوتر
ياهوى تعب الهوى إزاي يوصف هواه
عايشه أنا حقيقه وف كل حلم ألقاه
لو تهت منه ألقى التوهه ف قلب ضياه
وصفك محال يوصل لوصفه عقل البشر
أنا العاشق هنا والتوهه ف هواكي غيه
راسم خيال بأعيشك فيه بقلبي وعينيه
وصورتك في قلبي تقوللي قرب إنت ليا
جنون هواكي خلاني أشوفك ف كل الصور
لو تبعدي بزمانك أو حتى عني متبعديش
ولو مش حقيقه في الخيال معاكي بأعيش
جوا كلامي بتسكني عاشقك أنا كما الدراويش
ياحلم من الطفوله قلبي واخده سكة سفر
.... أيمن بلال....
ليست هناك تعليقات:
إرسال تعليق