قامات ثقافية
الشاعر محمد حسن العلي
حسان أبو الطيب
======
نيسان طل
نيسان طل و زهروا اللوزات
وتلفتت عاخصورها الزرعات
وحقولنا لبست تياب جداد
وتغندروا حوا كير حارتنا
وبين السنابل رقصت الوردات
و(هُدهُد) صحي يسكبلنا النغمات
وكمام فل تعاند النجمات
عشقوا البيادر حد ضيعتنا
ورجال عالمقطع ألن بصمات
وبعرب كوسا الحمي بالفرضات
بمدراجة الوشواش بالتاروع
ونصبوا على الأعلام رايتنا
بوادي الصنوعه نشرب الميات
من بعد ما نرمي سبع بحصات
بجورة دروبي نحلب الغيمات
تايرتوي محصول حقلتنا
بمجوز الراعي يرتعو النعجات
وشلعة غنم تسرح على التلات
بأيدو الراعي يدور الجبنات
وياما حلب بالغلط عنزتنا
زواريبنا موعد عشق دافي
(وحسون) دايب عالكرم لافي
(وبوالحن) عشش بين الحفافي
والقمر ياما غفي بسهرتنا
عاجبالنا تغندر قمر نيسان
مخبي سرارو منعرفو عشقان
بوجهو الضاوي الحب والإيمان
ونبضة عشق من قلب نجمتنا
والفرح جوا قلوبنا بيضل
وطارود رغم التعب مابيكل
وموال (بو محمود) فوق التل
كلو عزيمه تشد همتنا
والمنجل الناطر مع المغمار
موعود يحصدو موسمو بأيار
مسنون حدو وغارق بأحلام
وقصة غراموا غمار حنطتنا
عنا بكل تله مباخر نور
عالجبل فَوْقَ السهل عابشور
عالروزنه اللي ناطرا بسرور
ندرّي مع الجيران عرمتنا
أول شقوق الضو طل النور
بتقول أمي زقزق العصفور
(رمايات بكرا خلص نامت بور)
الجيران عالأمان سبقتنا
وعن ظهر قلبا حفظت الأشعار
عالمصطفى وعن آله الاطهار
عن بني هلال وعن حروب الزير
وتمسح برغم الألم دمعتنا
تقلي يا ابني بيك موصاك
درب الورد مليان بالأشواك
وشغل الأرض لا تأجلو أصحاك
حكاية تعب تشحذ عزيمتنا
حطي الخبز واللبن زوادي
أمي أرضنا منعبدا عبادي
بالفاس عشّبنا الأذى منها
وما نبيعها بالذهب لو متنا
سنوني سفيرة حبنا لبلادها
قطفة حبق غنت أمل ميعادها
نصحى عاصوتا مع شقوق الضو
(وأمّان) ناطر بس وصلتنا
والموقدي تحضن لهيب النار
سليقة الحنطة وبرغل ودردار
وبربارتا بتحكي عن الأخبار
وعالميجنا بتحن خضتنا
وتفضلو عاخيرنا الميسور
خبز الطري عاحفة التنور
ورغيفها من قلبها منذور
قصة كرم عنوان عزتنا
ليست هناك تعليقات:
إرسال تعليق