.....حلوة الأحلام .....
عارفة لما تقربي بيجرالي إيه
بأتوه حتي إسمي بأدور عليه
وأنسي جاي منين ورايح فين
وتاخدني إيدك لعالم حلمي فيه
وأول لمسة ألقاني تايه مش أنا
أنسي مين أنا وعمري كام سنة
أنسي مكاني كأني مش من هنا
كل اللي فاكره إنك حلم بلاقيه
وفرحتي بيكي تنسيني أحزاني
تاخدني زمن ميعرفهوش زماني
وكل كلام الحب ألقاه علي لساني
وكل جمال الحياه أنا عايش فيه
ياصورة صعب يوصفها أي زمان
جمالها صعب ينكتب له عنوان
خيال عدي حدود الزمان والمكان
ف عيونك طريق واخد قلبي ليه
أول كلامك أهلا ونظرة عينيكي
نظرة نسيتني حتي أرد عليكي
طولي وحياة جمالك لمسة إيديكي
لحد ما ألاقي حرف عليكي أرد بيه
ياخيال عدي حدود الخيال والمحال
ياحب من غير جواب أو حتي سؤال
نظرة وبس والقلب بعقله بقي رحال
هو بس سؤال إنتي بجمالك تبقي إيه
وف عز الكلام واللقا والدنيا ساكتة
رن المنبه قوم الساعة بقت ستة
عندك قضية وجلسة وطريق وسكة
راح الحلم ف ملف قضية خلع يابيه
.... أيمن بلال....
ليست هناك تعليقات:
إرسال تعليق