(نحب البصارة)
*******
سيادة حبيبنا كبير الوزارة
سلامي بمحبةوتحيةبحرارة
محسوب جنابك
مبيض محارة وساكن في حارة
في صالتين واوضة شبيه المغارة
********
واحنا النصارة
ضروري في صيامنا
واساسي البصارة
ولكن خسارة مفيش عندي زيت
واسأل ماتيلدا تقول لي ياريت
********
ولازم ندمس في بيتنا المدمس
مع عدس اصفر ولمون معصفر
وعدسون بجبه دا اكل الاحبه
وبعده نقزقز سوداني ولبه
وتبقى في حياتنا الامور مستتبة
********
وفينا الغزالة وفينا اللي دبة
وفينا الصنايعي وفينا الاطبا
ومارينا اللي واقفة هناك مشرئبة
تنادي لجارتنا مدام مرجريت
وتطلب ازازة يكون فيها زيت
********
واحنا النصارة نحب البصارة
ولكن خسارة ترد بمرارة
مدام مرجريت
مفيش عندي زيت
َولا في اي بيت
********
وياما كتبت وياما شكيت
ورفعت ايدي لربي ودعيت
تتوفر وتكتر وترخص يا زيت
تتوفر و تكتر و ترخص يا زيت
********
فوزي جلاب ابو سمير
هذا الزجل ضمن ازجال ديواني (محدود الدخل) الصادر في ديسمبر ٢٠٠٨ ونشرته في جريدة الاخبار يوم الجمعة ٢٠٠٨/٥/٢٣
ليست هناك تعليقات:
إرسال تعليق