نفس الطريق
*************************
هو ده نفس الطريق مشينا فيه
كانت ايديك تحضن ايديا ازاى وايه
وتقول كلام كنت اسمعه واحس بيه
راح فين ده كله عن الكلام وسكت ليه
راحت خلاص كل الايام الطيبه
قلبى فاكرها وحاسسها لسه قريبه
ايام زمان ايام ماكنا فى الصبا
ياريت تعود وامى وابويا والطبطبه
ياخسارة ياعشرة زمان خلصت خلاص
كان لسه فى خير كتير فى قلوب الناس
الوقت فين بعدنا عن بعضينا ليه
والكل انشغل عن أهله ومافيش احساس
اه يازمان بنعيب عليك واحنا اللى عيب
الكل كان سوى لأخوه دوى وطبيب
دالوقت غاب عن دنيته ولاعاد قريب
بقى يعدى جنب منه تقول غريب
وانا ببكى على الايام عدت قوام
القلب كان مطمن فيها وكنا ننام
ولا عاد فى حاجه بينا تربطنا سوى
ولاعاد سلام مابينا أو حتى كلام
ياخسارة الأيام اللى كانت وعشرة زمان
عمرى مانسيتها وفاكرة نفس المكان
اللى جمعنا انا وانت واللى كان
كل اللى بينا انتهى حتى وهان
هانت عليك عشرتنا والعمر الطويل
اللى كان مليان بالذكريات وادى الدليل
والكل يشهد علينا وطريق طويل
ياما مشينا فيه سوى والف ميل
هنسى خلاص مش هافتكر كل اللى كان
وادق فى قلبى مليون وتد ماهو أصله هان
انسى خلاص انا نسيت ولاعادش كان
لاذكرى تفكرنى بيك وقفلت البيبان
***************************
*راوية حسن*
ليست هناك تعليقات:
إرسال تعليق