في الذكرى السنوية الخامسة للغالي الحبيب اخويا جرجس سلامه جلاب
**********
اخويا جرجس مات
وراحت الرجولة والجدعنة
وهقول انا للممات
ياريت اللي مات ده كان انا
************
دا كان جدع اجدع مني
وكان كريم أكرم مني
في السن انا اكبر منه
بحنانه كان أكبر مني
***********
طول عمره عايش متغرب
ألمانيا عاش فيها والنمسا
وكان بيبعد ويقرب
ولا عمره يوم اهله بينسي
***********
وكان مطيع بار بوالديه
ويحب اهله وأخواته
وكان لغيره اللي في ايديه
وكان كتير ينكر ذاته
***********
وبنته وابنه ومراته
كانو هما دول كل حياته
وكان شايلهم جوا عينيه
وهما يسعدوا أوقاته
***********
ومشيت يا جرجس ليه تسيبنا
من غير ما حتى تودعنا
مادام الفراق هو نصيبنا
بنبكي و قلوبنا بتوجعنا
***********
العيون بكيت يا جرجس
والقلوب فيها الجراح
الدموع أمته يا جرجس
قدرت ترجع اللي راح
الدموع أمته يا جرجس
قدرت ترجع اللي راح
***********
اخوك الحزين الي ان القاك
(فوزي سلامه جلاب)
ليست هناك تعليقات:
إرسال تعليق