بتاريخ 25/6/2021
(قصيدة برق حارق )
بقلم الشاعر المصري
أحمد إبراهيم النجار
كنت عارف
اني شمسك يوم هتُغرُب
والحنين يصبح سراب
كنت مؤمن بالنتيجة
بالحقيقة
قبل ما شوف الجواب
ايوة كنت كتير بكدّب
قلب حبك وف هواكي
عاش وداب
كنت بنسي وقت واقع
بين ستار الوهم غاب
وف عيونك بحر عاتي
فيه غريق والقلب شاب
من ضبابك
من هياجك
من جمودك
حتي صوتك
برق حارق كل أملي
كل حلمي
كنتي بركان العذاب
اه يا سرقه مني زمني
اه يا واخده منى حلمي
فوق ركام كل السحاب
اه يا ساجنه الضوء
فى دربي
وبأيدكي قفله فيا
قفله فيا الف باب
مش هلومك ع الرحيل
ع السنين
ع الأنين
والحنين اللى ف مشاعري
منك انتي كان عقاب
مش هقولك امتى راحله؟
كنتي رحله بيها جرحه
قلب حبك بس ساب
الوهم رامي
من ردودك تاه كلامى
والسكوت اكبر عتاب
مش بلومك عيشي يومك واكتبيني
جنب هامش الكتاب
وارفضيني
واجرحيني
واسجنيني
حتي لو فكرت أصرخ
بين دروبك امنعيني
غمضي عينك وغني
قولي أني كنت عندك
وقت عابر
فى دفاتر مهملات
والفراغ أصبح مالوش
اي معني ووقت فات
عيشي عيشي بنبض قلبك
بس نبض الحب فيا
والله أوشك ع الممات
كنت ليكي وقت سالك
في طريق الذكريات
والحقيقة جرح نازف
من كلامك من سؤالي
ومن جوابك
أنى واحد من حياتك
راح ومات
عن وجودك راح وغاب
كنت وقت وساعة جاريه
فيها عقرب الساعات
مش هلومك ع الرحيل
ع السنين
ع الأنين
والحنين اللى ف مشاعري
منك انتي كان عقاب
كل لحظه حلمت بيها
بقربي منك كان سراب
إمتى راحله؟
بقلم الشاعر المصري
أحمد إبراهيم النجار
ليست هناك تعليقات:
إرسال تعليق