سيناريوهات
وكله واخد دور البطولة
ومفيش وجع. ..ولا فينا من دمع وأهات
خلي السعادة تكون بطل الرواية والحكايات
والإبتسامة عنوان البداية .ومفيش نهايات
وإركن جراحك.......... دمعتك
دي ممله والناس....... كرهتك
وإرمي اللي عدي في حياتك
وإوعاك تفكر في اللي... فات
دورك ملك ..دي بسيطة وزرار زمبلك
هتدوس عليه تبقي الأمير وإن هزك
عسكري غلبان أو قل في نظرك .أو قولت جبان
هتبقي خسران كتير ..دا بيترقي يبقي وزير
بس الكارثه لو هده غروره ......وصاحبنا مات
وحصانك جامح سارح واخد طابيه في وشه وفاتح
ميت باب للعبة الجاية هيهدد بيها في خطوة تجنن
واللعب بجد علي تقيل ..ماتبطل خيبة وإتعلم منهم
يا عويل ..يااا عويل
ولا أنت مصمم تبقي عروسه .دميه بخيط
أخرك حرفك وشوية شخابيط
مشدود في إيديهم ونهايتك كومة ومركونة كراكيب ورفات
أبيض وأسود .شاشة سينما ومسرح طول اليوم منصوب
حد بيكسب واحد يهرب واحد يضرب
غيره كتير بيبات مغلوب..
غيره ممثل أوي بجدارة
تبقي معاه ع الأرض في ثانيه فوق السما واخدك بجناحه
حاضنك شايلك جوا ضلوعه
علشان يرميك واقع متحطم ...أشلاء وبقايا
وتعيش لسنين مقهور متلطم
وياريتك لو يوم تتعلم
إنما خيبتك طيبتك هبلك .
خلوك أخر الصف بعيد
دورك ضايع بالتأكيد ..
واللي أكيد أن الدور مش جي عليك
لا في يوم هتكون الأول فيهم
ولا مره عرفت تخليهم
كوره شراب .
والعمر بيتسرسب بسكات
طب صدقني وجرب تبقي ملك في رواية
هتلاقي أجدع واحد فيهم بقي هو الكوره في رجليك
يجري يطيب ويبوس الإيد
يا أهبل عشت العمر مسامح .عشت عبيط
طب جرب خليك مسمار يوم في قلوبهم
قوم حول قلبك لحديد
إنسي الطيبة في بطولة بكره
وريهم وش التجديد ..وريهم إن القلب الطيب
لما يقرر إنه يثور .بيكون آسي عنيف وعنيد
قررت تفوق ..ولا مصمم هتقضيها نواح وأهات
داليا يحيي
ليست هناك تعليقات:
إرسال تعليق