الشاعر فتحى نجم المنصورة

أنا متهم بالفقر
وانى معنديش رأي
ولا بفكر في حاجه
غير لقمه لعيالي
هي اللي بادور عليها
في كومة  قش
لجل تبقالي
التهمه شيله تقيله
راشقه ولبسانى
وانا معنديش حيله
غير إنى أطاطي واداري
ماهي عين وصيباني
ملعون ابو الحاجه
اللي تخلينى جبان
بِش خيله كدابه
كفايه هم الزمان
أنا متهم بالفقر
مع إني إنسان
والمحكمة عوجه
ولا ليا في الحوارات
ولا ليا في الهوجه
ماشي جنب الحيط
ولا بركب الموجه
وجعي شديد يازمان
في الروحه والعوده
أنا متهم بالفقر
والفقر مش عيبه
بتعاير بالجنيهات
وبكلمتى للحق
بتحول الجنايات
والمُر جوا الحلق
بشيل هم الغلابة
منا منهم ياساده
كرامتنا في الانعاش
وبالجزم ننداس
وقهوتنا بقت ساده
مع إنى بحبها
ومخلص اوي لها
فكي علينا شويه
الحيل تعب واتهد
لحد إمتي القسوة
عشان ملناش حد
لنا رب اسمه كريم
بيجيب لينا الحقوق
ويجمع الفتات
من حنك الشقوق
بس جميلة وراضيين
اللقمه لو حلال
حواليها متجمعين
واحنا علي قد الحال
الفقر مش عيب
لقمتنا علي قد الجيب
وعامل نفسي عايش
مع إني مش عايش
ومتحملين الإهانه
لساكي قاسية وظالمه
وفردا علينا الضلوع
والله دي إهانه
كم ورقة في الجيب
بتقولوا دي إعانه
يا دنيا والله عيب
الخرم وسع في الجيب
آه ياخلق ياجبانه
بس بنحبها
وشايلين الأمانه
حزامنا قرح الجلد
والثقب بدمامل
والليل طويل ع المريض
يحتاج حد شايل
فكي بقي لجل الحمام يطير
يبنيلك الغيه ويسمعك مواويل
أنا أصلي  مصري أصيل
مهما الجناح يميل
أنا ابن الهرم والنيل
عاشق مغناوي
بقلمى / فتحى نجم المنصورة
27/9/2019الجمعه