اليوم كبرت..
أمي .. يا أمي..
اليوم كبرت
يا أمي
"نني .. نني
جاك النوم ..
أمك قمرة
و بوك نجوم
و انت هليل كل يوم.."
تتفكر هاذي الغناية؟!
ماكينة الخياطة
درجية الماء .. الكانون ..
و براد التاي بحذاي
و تتعاود
في وذني الغناية
صغيرة في حضنك
و روحي فوق الغيوم
تحلم فرحانة
بالك غدوة فطوم
تكبر .. و تصير
تحن و تعاون الفقير
أمي .. يا أمي
اليوم كبرت
يا أمي
ما زلت نتذكر
التوتة و العنبة
و قبيس العافية
و البخور عجعاجي
في السقيفة و ع العتبة
و مشموم الياسمين
و عقد الفل
و حوض النعناع و الحبق
و محبس القرنفل
ما زلت نتفكر
أيام السدة
و "القرقاف" و غرزة الحساب
و الملحفة و المخدة
و رشمة النوار
اللي بيدك ترشمها
و بمحبة لي تعلمها
أمي .. يا أمي
اليوم كبرت
يا أمي
"يا الليري .. يا الليري ..
تكبر بنتي و تصيري
و تاخذلي أميري
و إلا ولد الوزيري .."
تتفكر هاذي الغناية؟!
ماكينة الحلوى
الراديو
و قهوة في الجزوة
و مرش القوارص
و المشط و المراية
و "النسترو" الأحمر
و إيديك في شعري
تعملي سوالف و ضفاير
نتشهى زميطة و فطاير
من غير ما توخر علي
في الحال يكونوا بين يدي
أمي .. يا أمي
اليوم كبرت
يا أمي
تتفكر .. تتفكر
كيف نبكي .. و تسكتني
و بكلمة حلوة تضحكني
كنت تصورلي الدنيا
في غناية
"عرضوني زوز صبايا
وحدة فنار
و الأخرى سمعة ضواية...
هاك النهار.."
تحكيلي عاللمة
على باب الخوخة
و باب الفلة
و ضحكة و توشويش
ما بين الخالة و العمة
بلمساتك تنسيني
الدنيا و ما ثمة
أمي .. يا أمي
اليوم كبرت
با أمي
عرفت معنى الأمومة
عرفت علاش
نمدلك الحاجة تخبيها
في حكة و إلا في صرة
تحاضيها
مرة .. ورا مرة .. ورا مرة
نتساءل في قلبي: "علااااش؟!"
تضحك و تقلي: " وقتاش؟!
تكبر و تعرف
اشنوه الضنى
و اشنوه معنى الكبيدة؟"
نهرب و نقلك:
"إيه.. هاك الأيام
ما زلت عليهم بعيدة
خليني
سارحة في خيالي و نعوم
ما بين موجة و غيوم
و أنا في حضنك
يا أمي
يا أمي
يا أمي
بقلمي فاطمة حشاد
2020/08/09
🎊🎂عيد ميلاد سعيد و العمر كله يا غالية🎂🎊
ليست هناك تعليقات:
إرسال تعليق