واللى شايله إبنها بتلف بيه ع الدكاتره واللى بتبيع الشاى ويا الفطير
واللى قاعد شغلته يعد الهموم ويقول دا بكره يجيله يوم اللى ظلمنى وعامل أمير
واللى نظارته يدوب على قدها ..يقول وصلنا للمحطه يرد غيره ياعم لسه فاضل كتير
واللى شايل هم امه ويا أبوه واخواته الصغار وبيصبر نفسه بكلمه واحده ياواد إسكت إنتا الكبير
واللى همه يمد ايده جوه جيب غلبان فقير
واللى واقف ع البيبان ينتظر محطته ويقول يارب أرجع بخير
ببص فى عيون الغلابه تنزل منى دمعتى غصب عنى ..وأقول يارب إنتا القدير
والزمن بيلف بينا زى قطر واللى منا بيجى دوره لازم ينزل يلاقى مسواه الأخير
وأهى دنيا ووخدانا ولاهيانا ..ولا حد عارف أخرتها إيه إن كان صغير ولا كبير
وسط قطر الغلابانين ..العجوز بتمد أيدها على الغنى وعلى المدير
حاجه لله يابشر ...اللى يديها جنيه واللى يدعيلها بقلبه ويقول يارب يرزقك الخير
وانا اللى بتفرج عليها وبقول دا ينفع يا بلد...ست عجوز تمد ايديها ومين السبب الغفير ولا الوزير
ووقفت قدامها أقول ..حسبى الله العظيم فى كل ظالم أن شالله حتى يكون امير
مدت ايديا وقلت اديها حاجه وأعطى اللى فيه النصيب
لمعت عيونها من الفرح وقالت يارب يعطيك الخير وجتتك مترقدش لطبيب
الدعوه حلوه وانا من الفرح بوست أيدها وقلت ليها ربى يراضيكى فى عز الشيب
قالت ياولدى ..يعطيك وتقنع ..وعن الشيطان تروح ماترجع ويرزقك شفاعة الحبيب
ومشيت تنادى حاجه لله يا محسنين ..!!!
وهنا السؤال إللى قاتلنى ..ذنبها فى رقاب مين ...والجواب ربك فى الحق لازم يصيب
وقطر الغلابه جوه منه ألف قصه ...تشوف فيه كل عجيب
محمد طلعت
ليست هناك تعليقات:
إرسال تعليق